Luk 23 | NdeIBE | STEP | Ibandla lonke laseliphakama lamqhuba lamusa kuPhilathu.

Luke 23

1 Ibandla lonke laseliphakama lamqhuba lamusa kuPhilathu. 2 Base bemethesa icala besithi, “Indoda le siyifice ixhwalisa isizwe sakithi. Iphikisana lokuthela imithelo kuKhesari njalo izitshaya uKhristu, inkosi.”

3 Ngakho uPhilathu wasembuza uJesu wathi, “Uyinkosi yamaJuda na?” “Yebo, kunjengoba usitsho,” kuphendula uJesu.

4 UPhilathu wasebikela abaphristi abakhulu kanye lesixuku sabantu wathi, “Kangiboni lutho lokwethesa umuntu lo icala.”

5 Kodwa bagcizelela bathi, “Udunga abantu kulo lonke elaseJudiya ngemfundiso yakhe. Waqalisa eGalile, usehambe wonke ummango waze wazafika lapha.”

6 Esezwe lokhu uPhilathu wabuza ingabe indoda leyo yayingumGalile na.

7 Esezwile ukuthi uJesu wayengaphansi kombuso kaHerodi, wamthumela kuHerodi, laye owayeseJerusalema ngalesosikhathi.

8 UHerodi wathi embona uJesu wathaba wafa ngokuba wayekade etshiseka ukumbona. Ethathela kulokho ayekuzwile ngaye wayelindele ukumbona esenza omunye ummangaliso.

9 Wamthuthela ngemibuzo, kodwa uJesu kaze amphendula. 10 Abaphristi abakhulu labafundisi bomthetho labo babemi khonapho bemmangalela ngokuthukuthela. 11 Kwasekusithi uHerodi lamabutho akhe basebemchothoza njalo bamhoza. Bamgqokisa isigqoko esihle basebembuyisela kuPhilathu.

12 Ngalelolanga uHerodi loPhilathu babangabangane – mandulo kwalokhu babe yizitha.

13 UPhilathu wabizela ndawonye abaphristi abakhulu, lababusi kanye labantu 14 wathi kubo, “Lingilethele umuntu lo kungathi ubekhuthaza abantu ukwenza umvukela. Sengimhlolile phambi kwenu kodwa kangifumananga lutho lokummangalela kwenu. 15 LoHerodi kafumananga lutho, ngoba usembuyisile kithi; njengoba libona, kenzanga lutho olufanele ukubulawa.

16 Ngakho ngizamjezisa bese ngimkhulula.” ( 17 Kwakumele abakhululele umuntu oyedwa ngeDili).

18 Bamemeza ngalizwi linye bathi, “Msusele khatshana umuntu lo! Sikhululele uBharaba!”

19 (UBharaba wayephoselwe entolongweni ngenxa yokuvusa isiphithiphithi edolobheni langenxa yokubulala.)

20 Kwathi ngoba efuna ukumkhulula uJesu, uPhilathu waphinda wathi kabake bacabange njalo. 21 Kodwa baqhubeka bememeza besithi, “Mbethele! Mbethele!”

22 Waphinda wakhuluma labo okwesithathu wathi, “Ngani na? Umuntu lo wenze cala bani? Angiboni lutho kuye olungafanela isigwebo sokubulawa. Ngakho-ke ngizakuthi kajeziswe ngibese ngimkhulula.”

23 Kodwa baklabalala beqinisa ukuba kabethelwe, lakanye ukugcizelela kwabo kwaphumelela. 24 Yikho uPhilathu wasemisa ukwemukela izifiso zabo. 25 Wayikhulula indoda leyo eyayiphoselwe entolongweni ngenxa yesiphithiphithi lokubulala, yona leyo abayicelayo, wanikela uJesu kubo ukuthi benze intando yabo.

Ukubethelwa Esiphambanweni

26 Bathi sebemqhuba babamba uSimoni waseKhurene owayesuka emaphandleni, bamethesa isiphambano bathi kasithwale ngemuva kukaJesu.

27 Walandelwa ngabantu abanengi kakhulu, kanye labesifazana ababemkhalela bebubula.

28 UJesu wanyemukula wathi kubo, “Madodakazi aseJerusalema, lingangikhaleli; zikhaleleni lina kanye labantwabenu. 29 Ngokuba sizafika isikhathi lapho elizakuthi, ‘Babusisiwe abafazi abazinyumba, lezizalo ezingazange zithwale kanye lamabele angazange amunyise!’ 30 Lapho “ ‘bazakuthi ezintabeni, “Welani phezu kwethu!” Lakuwo amaqaqa bathi, “Simbokotheni!” ’

31 Ngokuba nxa abantu bezenza lezizinto lapho isihlahla simanzi, kuzakwenzakalani pho nxa sesomile?”

32 Amanye amadoda amabili, bonke beyizigebengu, labo baqhutshwa kanye laye ukuyabulawa. 33 Bathi sebefike endaweni ethiwa luKhakhayi bambethela esiphambanweni kanye lezigebengu lezo – omunye ngakwesokunene kwakhe, omunye ngasekhohlo. 34 UJesu wathi, “Baba, baxolele, ngokuba kabakwazi abakwenzayo.” Njalo base besabelana izigqoko zakhe ngokwenza inkatho.

35 Abantu bema bakhangela, ababusi bona bamklolodela. Bathi, “Wasindisa abanye; laye kazisindise nxa enguKhristu kaNkulunkulu, Okhethiweyo.”

36 Amabutho lawo eza amhoza. Amnika iviniga yewayini 37 athi, “Nxa uyinkosi yamaJuda, zisindise.”

38 Kwakulombhalo wokwazisa ngaphezulu kwakhe owawusithi: LO UYINKOSI YAMAJUDA.

39 Omunye wezigebengu owayelenga khonapho wamthuka wathi, “Kanti kawusuwe uKhristu? Zisindise wena kanye lathi!”

40 Kodwa esinye isigebengu samkhuza sathi, “Kawumesabi na uNkulunkulu, njengoba ulesigwebo sinye laye. 41 Thina sijeziswa ngokusifaneleyo, ngoba sizuza lokho okufanele izenzo zethu. Kodwa umuntu lo kenzanga lutho olungalunganga.”

42 Wasesithi, “Jesu, ungikhumbule nxa ungafika embusweni wakho.”

43 UJesu wamphendula wathi, “Ngiyakutshela iqiniso ngithi, lamuhla uzakuba lami epharadisi.”

Ukufa KukaJesu

44 Kwasekuyisikhathi esingaba lihora lesithupha, ubumnyama bembesa lonke ilizwe kwaze kwaba lihora lesificamunye, 45 ngoba ilanga lema ukukhanya. Ikhetheni lethempeli ladabuka kabili. 46 UJesu wamemeza ngelizwi elikhulu wathi, “Baba, nginikela umoya wami ezandleni zakho.” Esetshilo lokhu waphela.

47 Induna yekhulu isibonile okwenzakeleyo yadumisa uNkulunkulu yathi, “Ngeqiniso lo wayeyindoda elungileyo.” 48 Kwathi bonke abantu ababebuthene ukuzabona isiga lesi sebebonile okwakwenzakele, batshaya izifuba zabo bachitheka. 49 Kodwa bonke ababemazi, kusitsho labesifazana abamlandela besuka laye eGalile, bema bucwala babukela okwakusenzakala.

Ukungcwatshwa KukaJesu

50 Kwakukhona indoda eyayithiwa nguJosefa, elilunga loMphakathi, eyindoda elungileyo njalo eqondileyo, 51 owayengakuvumanga lokho abakuqumayo labakwenzayo. Yena wayevela edolobheni lakoJuda okwakuthiwa yi-Arimathiya, njalo wayelindele umbuso kaNkulunkulu.

52 Waya kuPhilathu wayacela isidumbu sikaJesu. 53 Wasesethula wasigoqela ngelembu lelineni, wasibeka ethuneni elaligujwe edwaleni lingakaze lilale muntu. 54 Kwakulusuku lokuLungiselela, iSabatha selizaqalisa.

55 Abesifazana ababeze loJesu esuka eGalile bamlandela uJosefa balibona ingcwaba lokuthi isidumbu sakhe salaliswa njani kulo. 56 Base bebuyela ekhaya bayalungisa amagcobo lamakha. Kodwa baphumula ngeSabatha bethobela umlayo.